pilno:KSFT/tsautu be me'e zo terdi

ni'oni'o la terdi goi ko'a cu ci moi lo plini be la solri be'o goi ko'e gi'e traji lo ka denmi ku ko'e gi'e traji lo ka barda ku lo rokplini be la solri gi'e selte'i lo ka se xabju lo jmive kei ku lo tarske dacti

.i pu za lo nanca be li 4pi54 ji'i gei 9 co'a ko'a zasti .i lo se carna be ko'a cu salpo lo julra'o be li 23pi4 lo kukru be lo plita be lo ve srumu'u be fo ko'a .i la lunra noi selte'i lo ka vitno ku lo rarna mluni be ko'a cu gasnu lo nu xasyctaru .e lo nu lo se carna be ko'a stodi lo salpo kei ku .e lo nu ko'a toltce jdika lo cnampetu

.i lo rokplinyborsenta be ko'a cu gunma lo so'o tektoni noi tinsa gi'e muvdu fo lo sefta ze'a lo nanca be li so'i pi'i ki'o ki'o .i lo 71% si'e be lo sefta be la terdi cu djacu .i lo drata 29% si'e cu tumla gi'e gunma lo kontinenta jo'u lo daplu gi'e se rirxe je lalxu so'i da noi pagbu lo plinyjauci'e .i so'i lo tumla be lo tcebernanjudri be'o noi se pagbu lo bisli je boxfo pe la .antarktikas. cu bisli .i lo nenri be ko'a akti gi'e gunma lo rainerplinyborsenta noi tirse .e lo barnerplinyborsenta noi likti .e lo rairbarnerplinyborsenta